മരുന്നും ശസ്ത്രക്രിയയുമില്ലാതെ രോഗം ശമിപ്പിക്കുന്ന ചികിത്സാരീതി. അതാണ് ഫിസിയോ തെറാപ്പിയെ ജനപ്രിയമാക്കിയത്. ഫിസിയോ തെറാപ്പിയുടെ പ്രാധാന്യം ഓര്മിപ്പിക്കാനായി ഒരു ദിനം തന്നെയുണ്ട്; സെപ്റ്റംബര് എട്ട്. വേള്ഡ് കോണ്ഫെഡറേഷന് ഓഫ് ഫിസിയോ തെറാപ്പിയുടെ നേതൃത്വത്തില് 1996-ല് തുടങ്ങിയതാണ് ഈ ദിനാചരണം.
ആരോഗ്യ മേഖലയിലെ ഒരു ചികിത്സാരീതിയാണ് ഫിസിക്കല് തെറാപ്പി. ഫിസിയോ തെറാപ്പി എന്നാണ് പൊതുവേ പറയാറുള്ളത്. രോഗകാരണങ്ങള് ഒഴിവാക്കിയോ, രോഗം പരിഹരിച്ചോ, രോഗിയെ പുനരുദ്ധരിച്ചോ രോഗിയുടെ ജീവിത നിലവാരം ഉയര്ത്തുകയാണ് ഇവിടെ ചെയ്യുന്നത്. രോഗിയുടെ ഉള്ളിലേക്ക് മരുന്നുകളൊന്നും നല്കാതെ പൂര്ണ്ണമായും വ്യായാമ മുറകളിലൂടെ രോഗം ഭേദമാക്കുകയാണ് ഈ ചികിത്സാ രീതിയുടെ പ്രത്യേകത.
ജീവിതശൈലീ രോഗങ്ങളില്നിന്നു രക്ഷനേടാന് പലതരം മരുന്നുകള് കഴിച്ചുകൂട്ടുന്നവര്, മരുന്നുമൂലമുള്ള രോഗങ്ങള് വിളിച്ചുവരുത്തുകയാണ് ചെയ്യുന്നത്. ഇവിടെയാണ് ഫിസിയോ തെറാപ്പിയുടെ പ്രസക്തി വര്ദ്ധിക്കുന്നത്. വ്യായാമങ്ങള്, മാനുപ്പുലേഷന് ടെക്നിക്സ്, അള്ട്രാസൗണ്ട് തെറാപ്പി, ലേസര് തെറാപ്പി, ഷോര്ട്ട് വേവ്, മൈക്രോവേവ് എന്നിങ്ങനെയുള്ള ഹീറ്റിങ് ടെക്നിക്സ് ഇവയാണ് ഫിസിയോതെറാപ്പിയുടെ പ്രത്യേകത.
ഫിസിയോ തെറാപ്പി മരുന്നു രഹിതമായ ചികില്സാ രീതിയായതിനാല് പാര്ശ്വഫലങ്ങള് ഇല്ല. മനുഷ്യശരീരത്തിന്റെ ഘടനയേയും പ്രവര്ത്തനങ്ങളേയും ശാസ്ത്രീയമായി ആധാരമാക്കിയാണ് ഈ ചികിത്സ രൂപകല്പന ചെയ്തിരിക്കുന്നത്. ലോകാരോഗ്യ സംഘടനയുടെ നിര്ദ്ദേശപ്രകാരം ഫിസിയോ തെറാപ്പി ആധുനിക വൈദ്യശാസ്ത്രത്തിന്റെ ശാഖയാണ്. സ്വതന്ത്ര ചികിത്സാ രീതിയുമാണ്. ഫിസിയോ തെറാപ്പിസ്റ്റാണ് ചികില്സ നടത്തുന്നത്. ലക്ഷണങ്ങളുടെ അടിസ്ഥാനത്തില് രോഗനിര്ണയം നടത്തുകയും ഓരോ രോഗിക്കും ആവശ്യമായ ചികില്സ നല്കി ആരോഗ്യനില മെച്ചപ്പെടുത്തുകയും ചെയ്യും.
ഈ ഭാഗത്ത് എന്തെങ്കിലും തെറ്റുകൾ കാണുന്ന പക്ഷം കമൻറ് വഴി ആയത് ചൂണ്ടിക്കാണിക്കുക... (alert-error)